திமுக எத்தனை பொய்களை சொன்னாலும், இந்தமுறை திமுக தோற்று ஓடப்போவது உறுதி என தமிழக பாஜ முன்னாள் தலைவர் அண்ணாமலை தெரிவித்துள்ளார்.

வேடசந்தூர் சட்டசபை தொகுதியில் தேசிய ஜனநாயகக் கூட்டணி அதிமுக சார்பில் போட்டியிடும் வேட்பாளர் பரமசிவம், தேசிய ஜனநாயகக் கூட்டணி தமிழ் மாநில காங்கிரஸ் கட்சியின் சார்பில் ஒட்டன்சத்திரம் தொகுதியில் போட்டியிடும் வேட்பாளர் விடியல் சேகர் ஆகியோருக்கு ஆதரவாக அண்ணாமலை தேர்தல் பிரசாரம் மேற்கொண்டார். இந்த புகைப்படங்களை சமூக வலைதளத்தில் பகிர்ந்து அண்ணாமலை வெளியிட்டுள்ள அறிக்கையில் கூறியிருப்பதாவது:

கடந்த ஐந்தாண்டு காலமாக, தமிழகத்தில் தீயசக்தி திமுகவின் ஏமாற்று வித்தைகளையும், ஊழல் முறைகேடுகளையும் பார்த்த மக்கள் திமுக ஆட்சியை விரட்டியடிக்க காத்து இருக்கின்றனர். விவசாய பெருமக்கள் அதிகம் வசிக்கும் வேடசந்தூர் தொகுதி எம்எல்ஏ ஆக இருந்த சுவாமிநாதன் செய்த ஒரே சாதனை, அமலாக்கத்துறையை வேடச்சந்தூருக்கு அழைத்து வந்தது தான். இவர் செய்த முறைகேட்டால், தமிழக மக்களுக்கு பொங்கல் தொகுப்பில் வழங்கப்பட்ட வெல்லம் கரைந்து ஓடியதை தமிழக மக்கள் மறந்திருக்க மாட்டார்கள்.

இந்தியாவின் அனைத்து மாநிலங்களில் உள்ள லோக்சபா எம்பிக்களின் எண்ணிக்கையை நேரடியாக 50% உயர்த்துவதற்கான சட்டதிருத்தத்தை பிரதமர் மோடி தலைமையிலான மத்திய அரசு கொண்டுவந்துள்ளது. ஆனால், தமிழகத்திற்கு தொகுதிகளை குறைத்து விடுவார்கள் என்று அடிப்படை உண்மையில்லாத பொய்யை முதல்வர் ஸ்டாலின் தொடர்ந்து பொய் சொல்லி மக்களை குழப்ப நினைக்கிறார்கள். ஆனால், தமிழக மக்கள் தெளிவாக இருக்கிறார்கள். திமுக எத்தனை பொய்களை சொன்னாலும், இந்தமுறை திமுக தோற்று ஓடப்போவது உறுதி.

தேசிய ஜனநாயகக் கூட்டணி ஆட்சி அமையட்டும்; தமிழகம் வளரட்டும். தமிழகத்தை தீயசக்தி திமுகவிடம் இருந்து மீட்டெடுக்க வேண்டும், மக்கள் விரும்பும் நல்லாட்சி வழங்க வேண்டும் என்ற கொள்கையோடு தேஜ கூட்டணி செயலாற்றி வருகிறது.

ஒட்டன்சத்திரம் தொகுதியில் கடந்த 30 ஆண்டுகளாக ஒரே சட்டசபை எம்எல்ஏவாக சக்கரபாணி இருந்தும், விவசாயிகளும், பொதுமக்களும் வேதனையில் வாடி வருகிறார்கள். 2023ம் ஆண்டில் மட்டும் ரேஷன் கடைகளில் இருந்து கடத்தப்பட்ட 900 டன் அரிசி பறிமுதல் செய்யப்பட்டது. தெரிந்தே இவ்வளவு கடத்தல் நடக்கிறது.

தமிழகத்தில் உள்ள நிலையை மக்கள் சிந்தித்து பார்க்க வேண்டும். ஊழல் முறைகேடு செய்து ஏழை மக்களுக்கு கொடுக்கவேண்டிய அரிசியை கூட பாதுகாக்க முடியாத கையாலாகாத ஆட்சி விரட்டியடிக்கப்பட வேண்டும்.